E Petre chì cantanu : Chjama è rispondi, Santa Riparata, 1ima parte.
Samedi, 27 Juin 2015 13:16

{youtube}ei8tn-UsGr8{/youtube}

Issu arrigistramentu hè statu fattu in Santa Riparata qualchì annu fà.


Sò prisenti da à manca à a diritta : Petru Santucci, Ghjuvan-Lavighju Villanova, Carlinu Orsucci, Ghjaseppu Micaelli, Roccu Mambrini dettu « U rusignolu di Ziglia », Francescu Simeoni, Olivier Ancey, Ghjuvan-Francescu Luciani, Stefanu Conca, Sonia Foti, Dumenicu Guerrini dettu « Minellu d'Ascu », Ghjuvan-Petru Ristori, Battì Calzarelli, Luiggi Savignoni, Francescu Santini.

A video principia videndu à Olivier Ancey è Francescu Santini chi impruvisanu, è scambianu nant'à l'origni di Francescu Santini : u so paese Merusaglia. Subbitu, a rima maganesca sbuccia, dice Olivier à Francescu « quallà in Merusaglia, ùn sanu fà, più d'un capellu di paglia. »


Seguita un dibattitu nant'à a baretta misgia d'Ulivieru è a macagna ripiglia di più bella, « cume hè che t'ùn sì perttutu in Nizza à u carnavale. »


Hè Stefanu Conca dopu, chì lampa a so strufata : » Car'amicu Simeoni, avà per a to chjamata, ti vulia ringrazià issa sera in Santa Riparata, chi ghjunta da Marignana, a mio rima s'hè spiazzata. » Li risponde Francescu Simeoni « Partendu da Marignana si colla per a Spilonca, a so musa hè paisana, è si sà mai ùn tronca, ti facciu i cumplimenti u m'amicacciu Conca. »

Francescu Simeoni chjama à l'altri pueti chì so stati muti sin'à avà, : « tutt'ognunu avemu intesu, è ognunu hà cantatu, e muse è i so paesi, indè lu cantu impruvisatu, avà vuleria sente l'aschese è quellu chi sia à latu. » parla quì di Minellu d'Ascu.

Dop'à a belle strufate di Savignoni, si ripiglia u sughjettu di a baretta misgia d'Olivier, a ci dice elle stessu : « u sughjettu di a baretta fece nasce qualchi strufata, ma ùn avia micca vistu, o ch'ella era tafunata, sò passatu in cabinettu è tandu l'aghju cacciata. » « Di vede mi cù a baretta, ognunu à ride s'hè messu, ma avà sò un'omu novu è aghju cambiatu versu, guarda chì, senza baretta, eiu sò bellu listessu. » U sughjettu sculliscia nant'à u capellu di GL Villanova.

Ma u sughjettu di u vinu è di a manghjusca, piglia a suprana cum'è sempre. Olivier taruccà à Carlinu « Ch'eiu vengu per cantà è tù ghjunghji per fà a cena, è per quessu chì avà rispondi cù a bocca piena, che t'ùn t'appia ingurgà, mi dispiace manc'appena. » « Caccia appena a cultella tandu ci feremu inseme puesia è paghjella. » « Eiu facciu ciò che possu, per risponde à e to chjame, eiu socu ch'aghju l'apitittu ma tù ai altre brame, so che tù ai o Charlie, a sai si chjama a fame. »

Issa video si compia videndu i pueti chì chjamanu torna à Minellu d'Ascu è cù Olivier Ancey chì adupra u versu di Francescu Santini : « Piglià volgiu anc'eiu avà, u versu di Merusaglia, a vi dicu in verità, mettu un pocu pacaglia, avà poi puru cantà chì sì pueta di taglia. »
Petru Santucci compia, partendu in Pianellu è chjamendu à Paulellu.

Commentaire réailsé par Geronimi Josepha.

 

    alt  alt  alt  alt  alt